方力申今日到旺角港九潮州公學中學出席中秋造餅慈善活動，與現任財政司司長陳茂波並肩而坐及分享。小方今年中秋節工作不在香港，團圓同搵食之間佢話想團圓多啲， 但父母心目中就想佢搵食。講到中秋節經歷，小方細個時候都曾經煲蠟，最深刻印象係玩到唔肯返屋企，俾阿媽打咗一巴喊住走。

小方好友前藝人林偉亮皈依喺慈山寺出家，林偉亮現時法號衍偉法師，信奉佛教小方同林偉亮經常打籃球弘揚佛法， 小方話：「我九歲已經認識佢，相識廿幾年，以前佢係南華會教練教游水，我喺南華會練水，我有一首歌曲叫《先苦後甜》，裏面有張相係我坐住喺佢膊頭上面，佢一路睇住我大，我又睇住佢皈依出家，我哋一直都有聯絡，同佢家人都熟， 由佢喺第二度返番嚟去慈山寺，弘法、打籃球同年輕人打成一片，好受歡迎，打波唔係一定講佛學，係團結精神，喺我嘅撮合之下，佢亦都一齊返過我天主教母校去做一啲講座，未來會做得更多，好多藝人都有幫手，例如林海峰幫慈山寺嘅籃球隊設計logo，阿Sa亦都有為大家打氣，江美儀亦都做好多慈善，平時自己都會帶家人同朋友去慈山寺。」

方力申現時係慈山寺義工籃球隊成員，信奉佛教，問到佢有冇意欲出家？小方阿彌陀佛手勢話：「我冇，緣份未到。」