黎芷珊今日同貓界明星——「忌廉哥」，到灣仔出席吸塵機產品發佈會。雖然好多人都呼籲唔好成日俾忌廉哥出嚟，等佢可以真真正正做隻貓，不過，佢今日都係出咗嚟，幸好「對手」只係得一個黎芷珊姐姐，唔會俾成班小朋友七手八臂亂摸同尖叫嚇親。而忌廉哥亦好得戚，完全唔騷芷珊姐姐，齋「屎面」，或者索性瞓覺。

問黎芷珊主持無綫節目《最佳女主角》後，有否調整酬勞？佢笑道：「舊年加咗喇，今年唔會，有獎先再加喇。」

談到噚晚《最佳女主角》播出嘅鄭秀文（Sammi）訪問，大獲好評，芷珊笑說：「好多人覺得Sammi同前助手阿爽嗰part好感動，本來諗住搵阿爽錄番啲感受，不過佢怕醜婉拒咗，佢私下力撐Sammi嗰陣唔係大家講得咁差！」芷珊更預告聽晚Sammi會談她生命中的一個重要男人。