復活節假期外遊，自然人多擠擁，是否夠輕鬆，要由旅客自己決定。
澳門C來自澳門，當年個個同學恨嚟香港讀書，入咗大學就留港成為香港永久居民，唔再返去，𠵱家好多人話澳門興旺過香港喎，事浮於人，搵工好容易，不過澳門C已在香港成家立室，有良好職業，冇意思重返澳門。復活節放長假，澳門C心血來潮，與老婆返澳門拜山，星期五中午到港澳碼頭買黃牛飛，好容易就過咗大海，過到去就煩咯，的士搵唔到，唔行路就要坐巴士，想話過夜，間間酒店爆棚，去食飯，度度排長龍，惟有打電話搵親戚，親戚揸車嚟接佢兩公婆返屋企瞓客廳一晚。親戚係老愛國，曾回鄉參加土法煉鋼，後來發覺老毛係癲嘅，千辛萬苦偷渡回澳門，但愛國之心不死。佢對澳門C話：「人人話澳門特區好，我𠵱家好傷心，周圍賭場都係親愛同胞，佢哋唔知點解有咁多錢，人人輸晒畀賭場，搞到有人肥到伸唔直條腰。祖國人民點解咁鍾意賭吖？隔籬四叔個仔話要送嗰細女去香港讀書，佢唔想下一代淨係識賭，成世喺賭場做事喎！」

次日親戚車澳門C四圍去，送埋佢去碼頭，但碼頭冇船飛賣，又唔見有黃牛，澳門C要等到晚上十二點先搵到船飛，上到船只見有幾十個空位，為之激氣，究竟啲船飛落在何人手上，竟然又冇人炒賣呢？真係百思不得其解。澳門C曾經想返澳門買間七百、八百呎屋，作周末度假，重溫舊夢，作享受小城生活之用，呢次復活節回鄉，與親戚傾咗一個夜晚，決定打消念頭，因為佢覺得澳門再無靜土，前途全部繫於賭場，內地遊客充斥於市，唔適合佢。當唔少大學生只想到賭場返工，晚上先至想上課嘅時候，澳門C頗慶幸自己早二十年移居香港。