周日的日乙升班附加賽，東京綠茵憑補時嘅絕殺入球，作客以1:0擊敗FC橫濱，下星期將會同磐田山葉上演終極升班戰。

東京綠茵今季以第六名完成日乙，趕上升班附加賽嘅尾班車，佢哋喺上一圈就作客擊敗大宮松鼠晉級，今場就要面對日乙第三位嘅FC橫濱。

根據升班附加賽賽例，排名較低嘅球隊唔單止需要作客，而且仲要喺90分鐘內擊敗主隊先可以晉級，即使和波都要出局，所以排名低嘅球隊要晉級相當困難。

FC橫濱今季聯賽對住東京綠茵錄得一勝一和，今場其實亦踢得穩打穩扎，下半場更先後有前鋒拿查比頭槌中柱同渡邊一仁射空門出界。東京方面亦換入杜格拉斯韋拉同李安度兩位前鋒加強攻勢。

踏入最後七分鐘補時階段，東京綠茵繼續搶攻，球隊喺最後一分鐘補時搏得角球，東京門將上福元直人上前助攻，仲喺近柱成功接應頭槌攻門，畀橫濱門將南雄太拍出不遠，杜格拉斯韋拉衛前掃入致勝一球，最終東京綠茵再一次上演「下剋上」淘汰排名較高嘅球隊晉級。

東京綠茵將會喺下星期面對日職第16位球隊磐田山葉，爭取自2008年之後重返日職就只差一步。不過輸咗嘅FC橫濱就真係慘喇，首先失落咗直接升班資格，嚟到附加賽又喺最後一分鐘畀對手淘汰，最慘就係隊中嘅老將三浦知良仲未可以重返日職，大家想喺直播睇「King Kazu」踢波又要等多一年喇。

--------------------
新球季，新陣容！利物浦 FC 18-19季球星進駐《BFB》！立即帶領紅軍，踏上登頂之路！ http://bit.ly/2oQObi1
--------------------
《體蘋果》陪你睇波講波
https://www.fb.com/appledailysports