被叫「偽毒坤」嘅吳業坤，日前喺叱咤拎咗「我最喜愛男歌手」金獎，唔少人都以為係陳柏宇拎，在場更有人喺坤哥上台時，傳出噓聲，上年憑《陽光點的歌》、《原來她不夠愛我》等，橫掃多個頒獎禮，已經拎過「我最喜愛男歌手」，今次再憑一首歌《百姓》再冧莊，網民都批評佢唔值得拎呢個獎。

今日有周刊爆原來不滿坤哥拎獎係另有內情，有傳上年坤哥拎咗獎之後，自覺升上一線，態度囂張，同啲巨星幫疏遠，再加上大台捧佢上男二、又做廣告代言，開埋紅館騷，就算巨星幫有聚會，佢一係臨時甩底，一係已讀不回，同公司同事開會時仲話要同Eason等巨星合作，忽然「離地」，令許廷鏗、胡鴻鈞、林欣彤疏遠，今年拎獎都冇人陪佢慶功，反而許廷鏗、胡鴻鈞就同獲「我最喜愛的女歌手」欣宜慶祝。

據知喺叱咤慶功宴上，影大合照時，坤哥亦尷尬企最後一行，亦冇人上前恭喜佢。坤哥受訪都直認今年聲勢一般，冇諗過再拎，自己都話冇預過，對於網上好多人批評佢，坤哥都喺fb留言，稱唔知點令全世界喜歡。胡鴻鈞早前出席活動都話坤哥每次約都係得個講字。