馬會牌照委員會星期五（8日），就會公佈下季騎師陣容，今季暫獲13場頭馬的沈拿，已入紙申請下季全季騎師牌照，呢位意國型男嚟到香港策騎半季，以鬥志鮮明見稱，相信獲批機會非常樂觀。

沈拿今季中來港，原來定咗目標，季內要贏15場頭馬，目前尚差2Win先「達標」，今晚（6日）第四場四班1000米匹「餘皇」，一連幾場都喺三班跑得接近，今次初次降落四班，沈拿亦特別憧憬，但直言10檔起步，沿途際遇需要靠運氣之神幫手。

訓練「餘皇」嘅練馬師告達理，對上兩季頭馬數目都唔夠數，今季亦暫只得9Win，要喺馬季最後個幾月贏多7場上岸，任務艱巨。

告達理一向支持新公司騎師，記得沈拿上季尾最後三個賽馬日嚟香港客串，當時人生路不熟，喺香港馬圈冇人脈，得到告達理大力支持，上季兩場頭馬都嚟自告廐，同時助沈拿打通咗香港嘅網絡。

沈拿話：「告達理當時係第一位肯支持我嘅練馬師，如果冇嗰兩場頭馬，或者我嘅策騎事業會完全唔同。」

沈拿懷感恩之心，今晚如果真係獲幸運之神眷顧，幫「餘皇」開齋，一定別具意義。