踏入牛年第一個交易日，由於本港假期期間，外圍股市氣氛不俗，希望今日港股會有好表現。最近入市，最驚係買中盈警股，由於重磅熱門股如中國人壽（2628）、中石化（386）等都可以失驚無神發盈警，買股票要避開盈警股，確要考功夫。
好似鼠年最後一個交易日，即上周五便連環十多家公司發盈警，其中內房股合景泰富（1813）及中國奧園（3883）都表示，去年度盈利會顯著減少。由於內房股如綠城中國（3900）、鴻隆控股（1383）、中新地產（563）等早前已先後發盈警，富陽（352）及新澤控股（095）更預告會出現業績虧損，故以上兩隻盈警股唔難避開。

礦產資源屬高危板塊

上市剛一年的興業銅業（505）也發盈警，預期去年底止年度業績將會錄得虧損，主要由於其存貨跌價損失，以及08年下半年經濟下滑及全球金融危機導致銷售下降所致。興業銅業上半年盈利已倒退18.5%，至6220萬元人民幣，如全年出現虧損，意味下半年業績相當惡劣。其他礦產資源股，是時候留意存貨跌價此一因素，料盈警將陸續有來。
較難預計會發盈警的是具內需概念的中旅（308）及佳華百貨（602）。中旅指因受宏觀經濟影響，初步評估後預期08年純利將按年下跌約20%。去年有奧運都要發盈警，真係估佢唔到。另一隻係美聯集團（1200），通告指受去年下半年樓市疲弱影響，全年業績可能出現虧損。美聯上半年賺約1.6億元，意味下半年可能勁蝕超過1.6億，真要睇睇詳細業績何以惡劣至此。
歐陽風