黃山怡（糖妹）今日喺康怡廣場率先同粉絲迎聖誕，完成活動就會飛去台灣做電影宣傳，聖誕節當日會到澳門工作，節日過得十分充實，興奮迎接聖誕。

工作得意，但感情就唔係好如意，糖妹話：「聖誕節未有追求者約，亦都冇追求者，可能自己太忙，要到過年或節日party加把勁，打扮得花枝招展先有，enjoy單身。」糖妹又話受相士指點，35歲會結婚，現在仲有段距離，可以拍幾年拖，為工作努力下先。

提到佢身邊好友例如陳嘉寶、賴慰玲等都已婚，糖妹話：「啲姊妹都有心介紹對象畀我，好明顯唔得啦，我鍾意由朋友開始慢慢嚟。佢哋結哂婚，同我冇話題，講湊小朋友經，o依家識朋友要睇下佢哋啲男朋友多唔多貨先，我都交個心出嚟做朋友㗎！」糖妹希望對象係要錫屋企人，多陪雙方家人，有愛心鍾意音樂。

更多娛聞，喺晒《娛果》
http://fb.com/appledailyent