隻1220海域繼續停牌，中環一眾股票佬繼續講葉劍波同傅明憲，證監同警察叔叔亦繼續努力，希望搵出點解大嗱嗱8億幾銀會忽然間消失得無影無蹤；至於小股東，繼續冇嘢可以做。或者，下次裝修唔使買牆紙。
照理，要調動一間公司嘅錢，必須有人簽名有人蓋印，有一定手續，咁最大嘅可能就係有內鬼。例如將啲錢由母公司撥去子公司，然後再撥畀子公司某啲股東，尤其係同公司話得事嘅人係自己人嗰啲股東；否則，咁多會計師核數師同獨立董事睇實，好難做手腳。無論點，爆單咁大鑊嘢，香港呢個金融中心聲譽難免蒙污。當我哋吹噓市值破10萬億指數又新高之時，小股東利益，究竟有邊個保障？

李澤楷被指放榴彈

隻8號仔又再停牌，同系隻866Sunday亦停埋，聽講係董事會否決麥記同新記個方案。自從澤楷二少要賣資產，都已經停過幾次，小股東都慣，只要唔好一復牌就狂升大跌然後又再停過咁醜樣就算。大家對啲監管機構都冇乜期望。
上個禮拜六，鬼佬報嘅《利是》專欄獨家訪問麥格理嘅馬世民，講咗好多關於呢單大deal嘅內幕（華華諗極都唔明點解呢個訪問會放喺專欄而唔係做頭條新聞）。當中，馬世民形容二少嘅做法等於喺一個塞滿人嘅房間放低個手榴彈，跟住自己閂埋門閃咗。
二少反叛係人都知，但阿太傅講到咁，都要回應吓嘅。佢哋嗰邊就話，麥記同新地嘅出價，係有條件嘅，條件係中方唔反對。言下之意，你哋根本就好清楚單嘢幾複雜，點解𠵱家又怨我搞寸個Party後拍吓屁股呢？
馬世民其實冇乜好嬲，嗰啲五個半樓上撲落去嘅股東仔，咪仲嬲。
李華華
讀者如有任何意見或報料，歡迎發送電郵至[email protected]。