明關照抑或暗整蠱？往往係一線之差，來港前後三季嘅「萬眾期待」，跑咗12次只得3亞2季未贏過，評分喺最初52分到家陣50分窄幅上落，評磅員睇得佢起咩？但呢匹處女馬上仗輸畀「勁飛揚」入Q，偏偏一分都唔加，又似乎睇佢唔起，究竟評磅員諗乜呢？所以話評分係藝術，抽象到搲晒頭，真係一啲都冇錯！
「萬眾期待」馬主王松斌等贏馬等到頸都長，身邊班老友亦撐到行，平時經常同王松斌一齊孖住睇跑馬嘅化妝品大王郭少明家族，周四晚分別有「牽動美麗」及「綻放美麗」齊出，後駒更與「萬眾期待」同廐，到時呢班馬主嚟個三響炮，咁就真係皆大歡喜！