鄧麗欣（Stephy）、方力申同導演葉念琛呢個愛情三角錯嘅組合，噚日為宣傳新片《十分愛》，去到商台接受訪問，但葉念琛就姍姍來遲，由小方同Stephy呢對緋聞情侶撐大局。開頭因為導演唔在場，佢兩個接受訪問就係咁打情罵俏，當Stephy話好怕大家嘅焦點放晒係緋聞上面時，小方就插嘴話：「冇人講咪仲大鑊，咁我哋套戲係講愛情嘛。」

後來小方見導演仲未到，即時發揮搞笑本色𠱁Stephy開心，佢話：「今次張首映飛做到好似請帖咁，公司亦都為部戲出寫真，但寫真集封面Stephy就佔成三分二個樣，Paco仲話因為有Stephy先賣得咁好，而Stephy仲要當住Paco面，話如果冇埋我個樣就賣得仲好！」旁邊嘅Stephy聽到後即時詐嬌話嗰次自己只係講笑，仲話小方呷醋。
訪問將近尾聲時葉念琛先匆匆到場，三人合照時就組成咗一個「嬲」字。葉念琛話對今次《十》片相當有信心，至於佢下一齣新片會否再次搵佢嘅「最佳女主角」Stephy？葉念琛就有所保留話：「要諗一諗個時間先，或者佢唔拍我呢？」