當年今日

似金庸筆下一代大俠?
馮仁昭四圍超:Juno想扮楊過一心愛小龍女

蘋果日報 2003/05/17 00:00


新人王麥浚龍(Juno)呢排人氣急升,馮仁昭收到料話搞慣舞台劇嘅導演林奕華,都諗住打Juno主意。林奕華會喺今年十二月十四、十五同十六日喺葵青劇院開三場舞台劇,內容會以著名武俠小說家金庸嘅名作做藍本。聽聞林奕華初步構思搵Juno演繹金庸筆下嘅楊過、令狐沖或者郭靖其中一個角色。
馮仁昭噚日問林奕華助手,佢話:「因為重傾緊劇本,好多嘢未定,話唔定會將三個角色混為一體都未定。」

睇小說學中文
而Juno噚日就喺電話度話:「我由細到大都好鍾意睇金庸嘅小說,我以前喺加拿大都係睇小說學中文,基本上三個角色我都鍾意,但我最鍾意嘅係楊過,因為佢嘅性格重情重義,好專一咁對小龍女,但係略嫌佢優柔寡斷,我覺得劉德華做呢個角色好深入民心。」Juno話自己唯一同楊過唔同,係佢嘅性格比較樂觀。

劉綽琪愛犬嚇親細路
劉綽琪早前帶咗佢心愛嘅雪橇犬接受寵物雜誌訪問,佢嘅愛犬幾曳,成日闖禍,重試過嚇到一位小妹妹跌喺地,令到劉綽琪好鬼尷尬。為咗令愛犬聽教聽話,劉綽琪決定遲啲將愛犬送去狗隻訓練學校,希望愛犬可以乖啲喎!
梁漢文雙喜臨門
梁漢文噚日到商台接受訪問,順便宣傳佢噚日推出嘅新碟《10號梁漢文》,加上又係佢女朋友Karen嘅生日,所以梁漢文心情好靚。
另外,梁漢文星期日會同陳奕迅、楊千嬅同梁詠琪演出「1:99音樂會」嘅歌手,去沙田新城市廣場及銅鑼灣世貿中心搞簽名會。

《天脈傳奇》惹官非
楊紫瓊同男友鍾再思最近惹上官非。據網頁HollywoodReporter報道,楊紫瓊同鍾再思共同擁有嘅電影製作公司MythicalFilms,早前與洛杉磯製作公司PandasiaEntertainment合資約一億五百六十萬港元,拍攝美國重未上嘅《天脈傳奇》,洛杉磯嘅製作公司前日入稟洛杉磯法院,話佢兩個毀約同不守承諾。

名導謝飛戰勝非典
六十一歲嘅著名內地導演謝飛,同非典病魔抗戰二十四日後,噚日出院。前日佢接受內地記者電話訪問,佢話𠵱家先真切體會到生活嘅美好。而染病消息曝光後,幾乎每日都接到幾十個問候電話。謝飛重話最感謝醫護人員,佢喺被隔離期間,醫護人員成日安慰同鼓勵佢,令佢最終可以有信心戰勝病魔。
empty
林奕華
empty
《姑姑,我哋隻鵰呢?》劉德華
《去咗學跳舞囉!》陳玉蓮
《神鵰俠侶》劇照
設計對白
empty
劉綽琪
empty
梁漢文
empty
著名內地導演謝飛
資料圖片