有「香港樂壇教父」之稱嘅歌唱老師戴思聰，不經不覺已離世三年。戴思聰同愛徒之一鄭嘉穎當年因「賣身契」合約糾紛，鬧至滿城風雨，當年戴老師大女兒戴蘊慧更曾拒絕嘉穎入靈堂。

今日有報道訪問咗戴思聰遺孀戴許梅德，佢喺專訪內除咗狂數嘉穎外，又講番戴思聰點樣疼錫嘉穎。

戴師母話當年嘉穎喺戴家居住三年期間，戴老師對佢呵護備至，除咗教佢唱歌及帶佢歎美食外，仲穿針引線為佢牽紅線。嘉穎學唱歌樣子青澀靚仔，戴師母就爆當年嘉穎學唱歌時，有唔少女學生埋身，不過戴老師唔想佢哋搞男女關係，就幫佢甩身。

據了解，原來嘉穎當年亦同跟戴思聰學唱歌嘅楊采妮嘗試發展，不過最後都因為性格唔啱，而未能再進一步發展。雖然戴老師唔想愛徒搞男女關係，但為咗令嘉穎一嘗戀愛滋味，佢就介紹洪欣俾嘉穎認識，奈何當年嘉穎太木獨，令洪欣感沒趣而不了了之，都係未能發展成為情侶。