【一語道破】嘲PSG好夾伊卡迪 迪肯尼奧：最啱佢呢啲無紀律嘅人去
蘋果日報 2019/09/12 21:10
國際米蘭巴黎聖日耳門法甲PSG迪肯尼奧莫路伊卡迪
名宿迪肯尼奧直指PSG最適合伊卡迪這類無紀律球員。
唔知大家仲記唔記曾經效力過錫周三同韋斯咸等英格蘭球會嘅意大利前鋒迪肯尼奧呢？當年佢喺球場火爆同充滿球味嘅表現都吸引到唔少球迷嘅喜愛。而呢位已經年屆51歲嘅名宿火爆依然，最近接受意大利傳媒訪問就嘲諷今夏天由國際米蘭轉投巴黎聖日耳門（PSG）嘅阿根廷前鋒莫路伊卡迪，指PSG最適合伊卡迪呢類無紀律嘅球員。
迪肯尼奧最近接受意大利傳媒《Il Mattino》訪問嗰陣就表示，完全唔意外伊卡迪會離隊去PSG，「老實講，好似佢呢類咁無紀律嘅球員，去PSG簡直就係天堂，嗰度最啱啲無紀律嘅人。之前有傳話安察洛堤嘅拿玻里想要佢，但真係會想要一個唔會為自己老婆失言而道歉嘅球員咩？」
除咗伊卡迪嘅紀律，迪肯尼奧都好懷疑伊卡迪嘅作用，「老實講佢係一個好依賴隊友傳送，靠傳中入波嘅球員，其實唔係好適合個足球潮流。」