「『油』不是80年代」開始,九位Cookies成員曾紅夠一時,其後傅穎、鄧麗欣(Stephy)、吳雨霏及楊愛瑾(Miki)拆夥單飛,「餅碎」更少機會聚埋一齊,睇番當年Cookies九位成員,目前已有三位做咗人妻級,包括吳雨霏、何綺玲、蒲茜兒,今日更有周刊爆,近年北上發展嘅傅穎(Theresa)唔聲唔聲同北京富二代玩秘婚,傳佢冇向一班「餅碎」成員派喜帖。
吳雨霏今年年頭喺facebook宣佈同「網球王子」洪立熙拉埋天窗;何綺玲(Elaine)就淡出咗娛樂圈,返咗澳門完成學業,上年3月出嫁做人妻,而另一「餅碎」蒲茜兒(Serena)四年前就同男友結婚,翌年就去咗加拿大安胎,已經有3位係人妻級。
睇真啲仲有兩個係「準人妻」,Stephy同男友方力申拍拖多年一直感情穩定,隨時ready結婚,另外,Miki與永安百貨太子爺郭永淳交住多年,當年被指係介入郭永淳同前妻嘅「第三者」,早前獲男友發聲明主動幫Miki澄清,更一度有傳佢哋今年就好事近。