賭王何鴻燊四太梁安琪噚晚同魯振順喺鴨脷洲舉行嘅慈善盆菜晚宴擔任表演嘉賓，同場仲有雨僑、莊思敏及薛家燕等出席。

身穿短褲便服嘅四太同魯振順合唱粵曲《帝女花之香夭》，不過佢哋就大反串，四太唱男聲，水準甚高，獲得唔少掌聲，而四太細女何超欣喺台下用手機幫媽咪拍片，15歲超欣又生高咗，越大越靚女。

此外，身為街坊嘅雨僑到場先知有傳媒採訪，佢就尷尬話：「我住喺係呢區，諗住同媽媽嚟食盆菜，着住平底鞋見大家，好彩有化妝，不過連頭都冇梳。」問到佢點解唔帶男友羅力威見家長?佢笑言：「我嚟陪班公公婆婆食飯，咩人都係到，唔使啦!見家長好大陣仗。」