近兩個星期最精彩賽事，必定係上周三（10日）賴維銘策騎「大運舞台」大戰潘頓「帝聖寶貝」，結果鬥到平分春色，其次要數當紅炸子雞何澤堯，「星運判官」生擒「紅旗星將」，技驚四座。

再一次證明港產騎師的推騎鞭打能力，絕不比外籍大師傅遜色，只要有實力馬在手，一樣可以發揮出水準。

近年何澤堯及梁家俊每逢暑假都到歐洲學藝兼客串，兩人共通點身材偏高，去完歐洲之後，檔子比之前放長，重心偏低，改善騎姿，推騎幅度大，落鞭狠夾勁，充分發揮手長腳長威力，成績突飛猛進。

似乎馬會未來派見習學員出外受訓，不妨考慮歐洲，英國及法國都出名盛產殿堂級高手。

翻查歷史，大師兄告東尼亦去過歐洲跑江湖數年，不用再獨沽一味去澳紐或南非，到過不同地方，會有不同見聞，對培訓本地人材有無限益處。

成功非僥倖，勤奮是無敵，沒有雷神的日子，華將能夠把握機會，提升自己技能，食正潮流，得到練馬師及馬主信任，的確值得一讚，目前蘇狄雄及吳嘉晉尚未開齋。

問心而論，二人都屬騎得之人，沒有支持，某程度上停滯係騎功沒有突破，如果仲想係綠茵場上競逐，不得不提升騎功及技巧，衷心希望不要放棄，機會只會留畀有準備的人，趁當打年紀，不妨出外走一趟，或有意想不到收穫。