周柏豪喺紅館舉行10周年演唱會《One Step Closer Pakho Live 2017》尾場，柏豪喺台上再次多謝老婆Stephanie喺舊年結婚時，要一個人自己搞婚禮，自己冇時間陪佢。到婚禮當日，行禮前10分鐘發現有記者，太太仲問佢使唔使取消婚禮，令佢覺得好感動，柏豪講到呢度，仲忍唔住眼濕濕。

到後台做訪問時，柏豪指自己目標其實想開多幾場，因為覺得未夠喉。柏豪話：「覺得自己仲有貨，開多幾場應該冇問題，不過真係冇期，或者裝備吓自己先。」問到會唔會開Part 2，柏豪就話未有打算，不過巡迴就下個月開始。

講到由於籌備今次演唱會，搞到同舊年年底結婚嘅太太，都仲未有時間去度蜜月。記者打趣話巡唱可以帶埋老婆去，柏豪亦講笑話：「都好喎，返大陸度蜜月。」問到老婆對自己演唱會有咩評價，柏豪就話：「其實佢(老婆)都有嚟演唱會，招呼吓啲朋友，仲有入後台拎白烚雞肉俾我食，佢覺得我唱歌穩定咗同埋自信我，或者同我年紀大咗有關啩！」而柏豪同老婆對於生BB亦早有共識，佢話：「我同老婆都好鍾意BB，會有計劃生，不過呢幾年係衝刺期，同埋想過吓二人世界先。」