近期環球市場壞消息可真一籮籮,在美國推出QE2後,內地就開始進行各樣收水行動,先有外管局推出7招進一步資本管制措施,防範熱錢流入,又在10日內兩度調高存款準備金率,為了打壓通脹,更研究推出價格管制措施,令投資者惶恐緊縮措施沒完沒了。接着就到港府突然出狠招穩定樓市,令樓市交投頓時大縮,亦打擊氣氛。
不見了差不多半年的歐豬又再上水,愛爾蘭剛剛話接受歐盟援助,又有人揣測葡萄牙及西班牙都快要伸手攞錢,歐債爆煲危機始終揮之不去。到了前日,南北韓在沒有先兆的情況下,突然駁火,更加震懾投資者本已漸漸脆弱的心靈。港股在多重壞消息的打擊下,已經由高位下跌了超過2000點,前日是兩個多月來首次跌穿50天線,港滙亦轉弱了不少,狀似資金流出,睇到呢一刻,看官或會覺得前景似乎變得黯淡,而且08年金融海嘯的情景仍歷歷在目,難免又會驚自己接了火棒。
然而,牛脾氣難捉,牛市震倉的幅度往往令人吃驚,現階段計,大市由高位調整了約8%,其實都係十分健康的調整幅度,置身牛市,最唔可以輸就係信念,否則調整時就會被震走,到升了一段時間才追貨,便變相接了人家棄置的火棒。