陳淑蘭（蘭子）日前喺facebook發表「引狼入室」言論，雖然蘭子未有指名道姓，但就引得女友人Crystal喺fb爆seed狂轟蘭子，話:「人格必須是你需要檢討的一個課程，朋友一大堆都被你嚇跑掉……跟你玩過、合作過的全給你出賣背後亂唱。」

據知Crystal同蘭子本來係好姊妹，前年蘭子仲介紹Crystal去男友利承武旗下餐廳做主管，點知有指蘭子經常喺餐廳醉酒鬧事，蘭子以為係Crystal向男友打小報告而好姊妹反目。有傳利承武因為蘭子連串失儀事件，最終喺去年同蘭子分手。噚日Crystal接受《蘋果》訪問時講到蘭子時話：「我係嚟認真做嘢，唔係做某人耳目，但有人喺餐廳飲醉酒就鬧，好心勸佢，仲俾佢當衰人，咁我喺餐廳做嘢，你喺個場搞事，我點可以唔出聲話佢。」而講到蘭子為人，Crystal就話:「你睇佢同個個都反面，佢真係要檢討吓。」(相關新聞： https://bit.ly/2ly4FdM )

對於Crystal一番言論，蘭子今日以短訊回覆《蘋果》時話:「Sorry，我不在香港，我會在自己節目同專欄回應。亦會保留法律追究權利，不想被人利用提升自己，多謝你的來電。」蘭子嚟緊星期四(28日)會為港台主持《開心日報》，而佢為某份免費報紙寫嘅專欄會出街，換言之星期四蘭子就會一次過回應。

對於蘭子話保留追究權利，Crystal今日回覆《蘋果》時話:「即管放馬過嚟！」

精選娛聞，喺晒《娛果》
http://fb.com/appledailyent