今日《天龍八部》手機遊戲舉行發佈會，大會搵嚟梁家仁做返喬峰做宣傳，仲搵咗四位靚女，分別係Deer鹿兒、林穎彤、香格拉同埋歐詠怡，四位靚女仲着埋古裝出現，仲有伊光同達哥。喬峰喺宣傳片入面，仲有四位靚女大打出手。

今次大會再搵梁家仁做返喬峰，問到酬勞係咪好好，佢就話：「唔知喎，錢嘅嘢要問我老婆喎，不過我都好忙，平時拍戲都好少玩電話遊戲，老婆就有玩，轉頭又要返上廣西拍電影。」問到會唔會返嚟香港拍電影，佢就話：「難啲喇，我喺香港拍咗40幾年，都係時候轉下地方，想睇下唔同嘅嘢玩下。」

梁家仁仲透露TVB都有搵過佢拍劇，不過佢就話：「啲時間夾唔啱，同埋喺TVB拍劇嘅時間好長，所以我唔想返去拍。」之前佢就話等緊個孫出世，嚟緊一月就會出世，問到之後會唔會抽多啲時候陪個孫，佢就話：「呢啲要睇我老婆，畀唔畀我退休。」

更多娛聞，喺晒《娛果》
http://fb.com/appledailyent