過去一星期證明，高明睇法係啱，同時亦係錯。或者咁講會較清晰：有啲睇法雖然心知，但落場後執行上總會有偏差。

正如高明喺過年前所講，今年要展開較有意義的升幅，必須要達至冇合理懷疑，客觀上要做到就係跌到死心。農曆年前一轉的確係跌到太殘，短線有反彈機會，而高明當期時去咗放假，冇把握到。

上星期，高明認為升穿返而值得重新入市，事後睇當時聯儲局新任主席鮑威爾未講話，懷疑未解除，結果亦都一入場只係剎那見到恒指上返31,799點，高位一瞬即逝。證明落到場博咗先算，之前諗乜都唔記得。

現時股市嘅「定價權」，仍然係喺美帝手上，聯儲局主席一句說話，或者美國總統一個決定，基本上已令所謂反彈推翻晒，短線話睇得明幅圖，其實冇乜意思，隔晚一句說話已扭轉局勢，亦都令高明此等彈出彈入之徒難以操作，容易左一巴右一巴，可幸冇造淡，只係不斷中左一巴，冇畀埋另一邊臉市場打。

反而中國「去槓桿」較令人憂慮，憂慮嘅唔係「去槓桿」本身，而係好多市場中人戴上歐美先進文明嘅有色眼鏡看待中國「去槓桿」，如果現價只係反映市場中人用歐美規則嘅角度去定價「去槓桿」影響，就會令高明有啲擔心。

近期美帝加息、關稅嘅消息拖累全球股市，雖然會有陸續有來嘅憂慮，但政策推出，例如加息0.25厘，或者抽鋼鋁關稅25%及10%，都叫明文規定，係咁多，就係咁多。所謂西方的一套不能照搬中國，中式政策落實要靠揣摩，落實時寧可做多，不能做少，國情需要必然會盡做，同時落多項政策，例如A股不能淨沽出，結果惟一可以沽嘅就係港股。

上星期港股高位跌1,345點，其實星期一已經有玄機露出，就係騰訊（700）喺開市競價盤時段一度大跌20蚊至432蚊，之後開市當冇事炒返上去，但巧合嘅係，之後星期三真係到價，並且星期四跌突至428蚊。證明知內情嘅人一早想不問價沽，只係唔知內情嘅人買盤太強，令到有人可以以更高價撤出。

港股最容易嘅一段已經過去，中美說了便是取代慢牛，中國國情盡做係雙刄劍，一旦有官媒傳出「去槓桿已經唔存在」，甚至鼓勵金融機構「理性務實適度再槓桿」，一言九鼎之下相信可以再創另一個牛三。但喺呢件事發生之前，今年繼續唔估趨勢，有趨勢出現，先當買保險咁買，左邊臉已被摑到腫晒，唔爭在被打多幾巴。
高明
https://www.facebook.com/bigricetea/