練海棠雖然已到半百年紀，但由於識打扮，把口啷過油，加上中佬身形冇乜點走樣，所以多年嚟吸引唔少索女埋身，更有偷食前科，而見慣風浪嘅伍詠薇(伍姑娘)，對於老公經常有艷遇，曾經講過：「有女埋身咪埋囉！佢係有好多女埋身，天蠍座嘅男人係唔會話畀你聽，所以我咪舒服囉！」

原來伍姑娘一早已經同老公講定「如果要走，早啲通知，唔想自己係最後一個知道！」性格剛烈嘅伍姑娘，估唔到對老公偷食，竟然如此睇得開！

伍姑娘曾經講過，以前自己有好多男朋友，細個嗰陣直情做『緝私隊』，攞晒男友嘅電話，出街食飯嘅單睇，見有古惑，就會打爛沙盆問到篤，逼男友招認，依家人大咗，反而事事睇得開。佢話：「唔逼喇，好煩啫！做人好似塊鏡咁，你只可以影響對方，唔可以改變佢，只要知道屋企個老婆最重要就得！」

至於喺圈中相識滿天下嘅伍姑娘，曾透露自己好友排名榜，排第一位係靚靚同Chilam夫婦，而排第二位嘅黃佩霞，今日就喺電話中回覆《蘋果》話：「我未睇新聞，未了解件事，但我哋個個朋友都知佢哋好恩愛，我唔係好信出面嘅報道！」