楊千嬅入行24年，首個個人世界巡迴演唱會終於誕生，昨晚她在可以容納2萬名觀眾的廣州亞運公園舉行「MY BEAUTIFUL LIVE楊千嬅世界巡迴演唱會」，老公丁子高擔任監製，父母亦有到場支持。整個巡演不惜工本，舞台效果出色，服裝有時尚品牌的高級訂造服，也有日本名設計師的手工。

甫開場唱了幾首慢歌，緊接再唱出多首快歌，勁歌熱舞後，千嬅在唱出周杰倫的《說好的幸福呢》前說：「每個人都有自信、好有力氣嘅時候，但同樣亦會好脆弱，好易有挫敗同冇安全感。行到嚟而家，心口要掛個勇字去迎接失敗，呢個大無畏精神，幸好有你哋呢班觀眾陪住我。」

唱到國語新歌《穿越》時，千嬅就叫觀眾留意歌詞：「演唱會希望同大家分享，我呢24年嚟自己穿越咗好多美麗人生，多謝你哋陪我，令我嘅夢想成真。呢刻心情好激動，想搞呢個巡迴演唱會好耐，好開心大家畀機會我。」尾聲時，千嬅感性地說：「好希望自己唱嘅歌去到唔同地方唱畀大家聽，呢個係序幕，你哋畀咗好多能量我，成就今日件事唔易，多謝監製丁先生鼓勵我，做tour呢件事一直放心中，但有咗家庭、小朋友，夢想變得好遙遠，有日佢（老公）同我講『你做啦！我會諗辦法㗎喇！』之後就成就咗今日，創業難，守業更難，有你哋，我可以堅守落去。」

千嬅於完騷後接受傳媒訪問，她笑言這個巡演籌備了十幾年：「一直好想做，啱啱set up咗公司，好多嘢要重新做起，多謝寰亞，好多歌曲嘅版權佢哋幫我接觸，丁生又自己落手落腳去同人傾，去唔同城市做電影謝票時，好多人問過我幾時開，我好想，但唔知幾時做得到。」千嬅透露廣州後下一站會到珠海開唱，希望暑期有兩個月休息陪伴兒子，回到香港開騷可能是2020年中的事：「應該有機會發生，好多都未有時間表，仲未可以入紙。」問到做巡演會否很大壓力？她說：「已經跨越壓力、興奮同感動，做新嘅事會有好多冒險，好嘅開始係一支好大嘅強心針。」

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
《動腦Q》周末主題夜
追加星期六、日 9:30 pm
星期一至五 10:30 pm
Day Day Q the money!
https://hk.adai.ly/veCxssynnV