有「港大飯堂」稱號嘅莎厘娜餐廳（Czarina）返嚟喇，呢排忙緊裝修，以趕及周六試業。一手創立莎厘娜餐廳嘅王殿華（王叔）連日監工，噚日有好消息公佈，話8月15號正式開張，會搞個開業派對，免費招呼新知舊雨食俄菜，當然唔少得招牌菜羅宋湯啦！

裝潢變潮　食物水準不變

有成50年歷史嘅莎厘娜餐廳，舊年結業之後，由王叔細仔王宗俠揸fit，殺入西營盤高街重開，改咗個新招牌叫「莎厘娜餐廳1964」。
佢話裝修得七七八八，趕得切本周六試業，已經有客人訂位。主打食品當然有羅宋湯、雜錦冷盤、俄羅斯牛柳飯同串燒牛柳，「因為舖租、人工上漲，加價在所難免，但計劃開幕初期會以優惠價回饋客人」。
王叔話，新舖裝修同以前有啲唔同，阿仔鍾意，裝潢會潮啲，但係食物水準不變，「我哋請番以前餐廳個廚坐鎮，客人可以食得番以前嘅味道」。
王叔仲話，餐廳8月15號正式開業，嗰日上午十一點到下午三點會舉行派對招呼新知舊雨，提供免費小食包括有大家至愛嘅羅宋湯，「我冇特別發信邀請啲熟客，都係口頭講，不過有發信邀請前港大校長徐立之，希望佢到時會嚟。屆時應該會有好多港大師生嚟捧場，生客都無任歡迎」。
有得免費食俄菜梗係好，而最令人懷念嘅，一定係嗰碗濃到化不開嘅俄羅斯湯。

李八方
mailto:[email protected]

莎厘娜招牌菜

王牌羅宋湯

雜錦冷盤

烚鹹豬手配開胃酸椰菜

經典俄國牛柳絲飯