（新增內容）

跟Irene同屬英皇藝人嘅吳浩康（Deep）出場擔任首位嘉賓，兩人合唱Irene同劉德華喺84年合作電影《停不了的愛》主題曲，估唔到曾經喺新秀歌唱比賽攞季軍嘅Deep，仲唱得差過N年冇出碟嘅Irene，每段頭一兩句都唱到冇乜聲！

唱完歌之後，Deep話：「多謝。」Irene呼籲觀眾：「畀啲掌聲Deep哥。其實呢首係我第二部電影主題曲。」Deep表示：「我記得男主角係劉德華。」Irene跟住話：「因為當時呢首歌好好聽，今晚決定唱畀大家聽。」

之後將舞台交畀Deep，阿Deep話辛苦晒Irene，仲讚佢今晚好靚：「好多謝Irene姐姐請我嚟呢個騷，今晚想借大家少少時間，我有啲事想講，因為同自己合作八年經理人，今晚係最後一個騷，我冇乜嘢可以送畀佢，希望送首歌畀佢，多謝佢呢段時間同我經歷高山低谷。」

一曲即畢，Irene換咗第二套露肩谷胸公主裙登場，由於裙子用立體花朵砌成，喺視覺上營造出胸前澎湃，台下的「巨胸翠如」鄧月萍都要行開！Irene唱完楊千嬅《小城大事》後，第二位表演嘉賓周國賢登場合唱《小酒窩》，估唔到周國賢都中咗Irene魔咒，唱到甩嘴！

唱完後Irene表示：「我哋認識係拍《三一如三》，嗰時覺得佢個樣好似華仔。」周國賢好奇問：「邊個華仔？」Irene答：「劉德華。」嚇到周國賢即刻退後幾步。Irene笑說：「你嗰時成日都扮華仔，你依家扮畀我睇吓。」周國賢即將反起外套扮華仔，Irene再話：「點解我請周國賢做嘉賓呢，因為我一直好欣賞歌手識寫歌又識彈樂器，可以自彈自唱，希望香港可以多啲唱作歌手。如果年輕人有音樂夢，一定要做自己鍾意嘅嘢。」

之後Irene返後台換衫，將舞台交給周國賢，佢再一次多謝Irene：「大約年半前拍《三一如三》，一直以嚟好少拍戲同劇集，當時幾乎每日都見到Irene，佢教我好多嘢，又成日請我哋食嘢，可能太掛住嗰段日子，頭髮都白埋。」跟住唱出《目黑》。

精選娛聞，喺晒《娛果》
http://fb.com/appledailyent