小巨肺Celine在《全美一叮》一鳴驚人，佢爸爸兼歌手兼音樂導師譚順生（自稱Dr Steve）依家竟然仲紅過個女，可惜都係負面新聞，如被指利用個女做「搖錢樹」，又俾家燕媽媽公開指摘不顧行規搶學生，而且收費乸利，之後再被爆個人得獎成績表與事實不符及刻薄員工等等，今早一返港，仲特登由A閘拖女走去B閘避傳媒，結果都係…。

Celine細細個就要過一個非一般童年，究竟啱定唔啱？譚生話係個女自己鍾意，係個女自己主動戒薯條，每周練歌廿個鐘……作為同門師兄個老婆，袁詠儀點睇？

靚靚袁詠儀、謝婷婷、薛芷倫及諸葛紫岐等今晚中環四季酒店出席護膚活動，由於張智霖與「小巨肺」Celine妹妹同屬蕭定一公司，記者問到靚靚有冇留意Celine嘅新聞：「有留意，好矛盾，自己覺得小朋友應該以學業為重，知道佢同老公同公司，知佢好少返學嗰陣出活動，通常都係禮拜六日出活動。」

問到家燕姐講到Celine爸爸要以身作則，靚靚話：「唔知佢哋有咩瓜葛，自己諗小朋友出嚟表演，父母喺身邊最安全，好似之前我搵經理人湊仔，都搞到腸胃炎，未必放心，雖然唔可以怪人，自己跟安全啲，要用呢個角度睇呢件事。

「身教呢啲事唔知，最緊要喺小朋友身上做出發點，大人要話畀小朋友聽世界係點，我成日都話畀嗰仔聽世界係美麗，唔想佢有負能量。」

靚靚又話：「好矛盾。天賜有呢啲才能，唔好埋沒咗，但都要學業為先。如果我個仔唱得好，都可能畀佢參加呢啲比賽紀念吓，培養吓佢自信，不過嗰仔唱歌似殺雞。」

提到魔童志願，靚靚笑言阿仔想做遊戲機人，佢話：「我同佢講，要讀好書先，先知咩formula打贏嗰game，佢都係做I.T.人。人哋行museum，我哋行睇電器地方。」

另外，諸葛提到暑假會同老公囝囝去美國，去樂園玩，佢就透露有留意Celine在《全美一叮》嘅表現：「好勁、好精彩。」問到佢會唔會畀小朋友學，佢就話：「睇天份，未去到呢步，爸爸唔係咁鍾意佢做呢 行，之前有廣告傾緊，老公都唔想，佢好介意，想佢讀書先，將來都想佢做生意，始終佢係大哥，我就唔介意，佢開心就得，做邊行都有出息。」問到如果兒子想入 行，老公反對會有爭拗，佢表示：「我讓佢，大方啲，尊重返爸爸，等佢大嗰啲同爹地嗌，唔好拖我落水，我係一個好媽媽。」