李寶利剛周日沙田賽事起孖，完美暫別香江，稍後將到日本客串，繼續策騎生涯。眾所周知，呢位意大利好手同巫斯義女兒、有馬場廖碧兒之稱嘅Kimberley蜜運中，人前人後均見煙韌，羨煞旁人。趁目前有幾日空檔未飛去日本，李寶利宣佈同Kimberley訂婚，遲啲正式註冊結婚。見到愛女搵到愛錫自己嘅另一半，巫斯義都感到老懷安慰。李寶利本月27日後就會帶埋Kimberley飛去日本，準備客串兩個月，兩口子到時又可以過二人世界。