近年自組公司轉戰幕後嘅方大同，今日喺九龍灣出席記者會，宣佈明年3月30、31號再踏紅館舉行兩場「TIO靈心之子巡迴演唱會」。事隔四年再去紅館開騷，大同話：「好多歌迷都同我講話等咗好耐，所以今次會新歌舊歌各佔一半，我自己希望每場演出都會有少少唔同，亦會請嘉賓。」

大同透露過去幾年自組公司後，忙住簽歌手做幕後，又出版兒童圖畫書：「呢幾年嚟已經出咗三、四本兒童書，會計劃一路推出。」大同解釋出兒童圖書係因為媽媽係從事教育工作：「後來我做音樂，媽媽就幫我做management，我同佢講如果遲啲搵到錢，就一齊做番教育嘅範疇。」

大同話出版嘅兒童故事書係以圖畫為主，再配合兒歌，所以近年來自己都有創作唔少兒歌，問都會唔會喺演唱會上有兒歌環節？佢笑言：「真係會有，已經諗咗其中一個環節叫做『艾美夢遊』。」仲話相信到時台上full band玩兒歌會好有趣，希望有機會請埋小朋友一齊玩。

精選娛聞，喺晒《娛果》
http://fb.com/appledailyent