張智霖（Chilam）噚晚喺澳門舉行《張智霖瘋狂有時演唱會澳門站》，佢以白馬王子look出場，唱咗一首歌就嗌熱要除褸，又大晒壯闊手臂，台下觀眾即時起哄大叫，之後Chilam發現耳機線甩咗，再大灑有味鹽花話：「我要揾番條嘢出嚟先。」到工作人員上台，Chilam再話：「你要伸手插入去，不過我件衫畀你扯到好緊，係咪要除衫呢？」現場觀眾又再瘋狂尖叫。

噚晚袁詠儀冇現身捧老公場，Chilam指佢身在北京拍戲，囝囝就隨表哥睇佢綵排。趁老婆冇監場，Chilam噚晚喺台上取笑袁詠儀迷戀韓國型男李敏鎬，又以佢做例子講愛情觀，佢笑言：「得唔到嘅愛情係最朝思暮想嘅，就好似袁詠儀見到李敏鎬咁，感覺就同我以下呢首歌嘅歌名一樣。」然後就介紹佢首歌《死去活來》。

鄭欣宜喺Chilam演唱會唯一嘉賓，欣宜將Chilam頂帽掟落台，幫佢揀觀眾上台玩遊戲，一位女歌迷上台即主動拖實佢，Chilam即笑言：「時下啲女仔都好主動喎！」而chilam以其「Cool魔」機師Look出場，加上多位性感舞蹈員不斷將手喺佢身上游走，又幫佢解褲頭鈕，再次掀起演唱會高潮。

完騷Chilam受訪時直指自己表現未到最好，他說：「可能綵排唱得太盡，自己又係處女座，所以比較追求完美。他唱《少一天都太短》及《義氣仔女》都落淚，尤其唱《少一天都太短》更喊至完全甩咀要重唱，Chilam表示：「因為好多人話喺賭場做騷，觀眾會比較平靜，唱到三分二啲人就會走，但今日好多人睇到尾，所以觸動到，冇枉費我個幾月嘅綵排。」