趙世曾斥資過億開拍電影《趙世曾傳記》，日前登報徵演員，獎金講緊係100萬，甚至係1,000萬，而《趙世曾傳記》今日就喺灣仔室內運動場舉行選角面試活動。

主角趙世曾先以一身籃球員造型現身，身邊仲有27歲嘅女伴冬冬到場打氣。趙世曾話電影至少要籌備1、2年：「劇本起碼都要寫半年，要寫到完美為止，我唔心急，仲要搵導演、製片。」佢就話自己唔會主演番，最多都係喺片尾現身：「我都係想講兩句，鼓勵下年青人。最緊要有夢想，我自己嘅夢想就係做到今日嘅趙世曾。」

年輕時已經被似貌似趙世曾嘅周文健，今日受訪時都話有興趣，可以演到中年以後嘅階段（新聞連結： https://bit.ly/2pDsRxI ）其實男、女角趙世曾有冇搵過咩藝人飾演呢？佢就笑住話：「都有啲傾過，不過唔講得，唔想得罪人。o依家都係逐步籌備咗先啦，搵製片、編劇同導演。」

趙世曾仲話拍戲唔係為咗賺錢，主要係想畀自己留個紀念：「好多人搵過拍戲、寫書，我自己都考慮咗成年。o依家就決定拍咗戲先，遲啲再寫書，美國、歐洲、俄羅斯都有人搵過寫書，美國仲話如果我出書可以賺到100萬美金，不過唔係為咗錢。」

咁呢次趙世曾又會投資幾多錢去拍電影呢？佢話一定唔止一億：「製片話幾多就幾多，我無所謂。」佢仲話明會喺電影入面爆秘聞，由初戀開始講：「我有超過10,000個女朋友，戲入面都會講2、30個。做人只係做一次，最緊要係開心，打波同女朋友都可以令到我開心，仲開心過賺錢。」

之前囡囡趙式芝話唔介意參演喎？趙世曾即笑謂：「佢冇同我講喎，要問番佢。戲入面一定會有佢嘅角色，不過可能唔係佢做返自己，至於一家幾口演出，我會參考下你哋嘅意見。」

咁到底今日嚟選嘅係咩角色？趙世曾話由主角到「茄喱啡」都有，仲話做到主角嘅話，會有好高酬勞添。講番面試嘅情況……今日有6位朋友到場面試，佢哋獲安排坐喺「電影選角坐位區」，不過趙世曾似乎想打籃球多啲，打個照臉之後安排面試者填form，記者要求趙世曾同面試者合照，趙世曾仲話：「唔使合照啦，等我哋選咗角色出嚟先都未遲。」

精選娛聞，喺晒《娛果》
http://fb.com/appledailyent