由ARON、JR、REN、旼泫及白虎組成嘅韓國五人男子組合NU'EST，因為四位成員參加人氣選秀節目《PRODUCE 101》而人氣急升，最終旼泫成功出線，成為限定男團Wanna One嘅成員之一，喺年半內旼泫將會暫停NU'EST嘅活動，剩下四人就組成小分隊NU'EST W繼續活動。而下月18日NU'EST W仲會來港舉行由德碩文化傳播有限公司主辦嘅《2017 NU'EST SPECIAL CONCERT in HONG KONG》，同港迷見面。

NU'EST W上星期攜新專輯回歸樂壇，專輯大賣外，佢哋喺韓國音樂節目上仲奪下出道6年來首個冠軍寶座，認真犀利。幾位成員得知奪冠激動得唔知講乜，隊長JR兩度鞠躬感謝家人同粉絲，ARON仲忍唔住喊咗出來，場面感人。

事實上自新專輯推出後，NU'EST W嘅主打歌《Where you at》就佔據多個韓國音樂排行榜嘅冠軍位置，喺韓國音樂排榜公佈，NU'EST W就分別登上專輯榜、數碼音源榜及下載排行榜嘅首位，成位「三冠王」。