Twins今日喺商台接受訪問,並宣傳新歌《LOL》。近日有指鍾欣潼(阿嬌)同契哥Calvin撻着爆緋聞,但阿嬌就話係遭人整蠱:「雖然佢係筍盤,但我同佢識咗成廿年,要一齊一早就一齊咗!」阿嬌又自稱仍然單身,同契哥冇發展可能,只希望對方早日搵到女朋友。
另外,有傳阿Sa男友陳偉霆搭上內地女星趙麗穎,導致「Sa霆戀」分手,阿Sa沒好氣表示:「唔係事實嘅嘢,成日都係咁傳傳傳,我都答到口臭!」
阿嬌就爆金句:「就好似經期咁,每個都有一次。」阿Sa坦言都好耐冇見過男友,問佢係咪因為經常分隔異地,先傳出分手?佢話:「唔係呢行嘅人就會咁覺得,但我好好,生活都好美滿!」