不過，重有一個更堅版本，就係話佢老哥覺得搬來搬去太麻煩，所謂「上屋搬下屋，唔見一籮穀」，你估貪玩咩。咁又係，依肥龍嘅算盤，佢今次重返政府，首要任務係幫煲呔搞掂啲政治工作，擺平各方勢力；其次就係要幫煲呔一臂之力，等佢可以連任成功，做埋第三甚至第四屆特首。
假如呢個猜測係啱嘅，老許又的確唔應該搬入去住，勞民傷財。因為煲呔一定唔可能立即搬走，等多兩個月就到秋天，到時又話要維修吓間屋，結果搞到冬天先入去住。你話肥龍兩公婆可以住幾耐？頂晒籠年尾就要搬走，因為佢要辭職幫煲呔選舉嘛。
八方一啲都冇誇張，睇番當年鄭維健，都係○一年十一月尾辭官離開政府，做董建華第二屆特首助選團嘅主帥。
即係話老許只有年半時間表演就要離場，除非煲呔搵到高人幫手，可以唔使搵佢，但係呢個機會唔高。○七年第三屆特首之爭肯定非常激烈，因為各路人馬，有志之士如唐唐、田少、振英哥以及吳光正必然全力以赴，煲呔一定冇今次補選贏到咁容易啦！
爆料熱線：29290000、27860099
報料傳真：26239278
報料電郵：
[email protected]