參加完六四燭光集會，又係時候預備7.1上街，前綫卿姐噚日同八方講，26個泛民議員陸續印製一批橫額，日內就會掛出街呼籲市民遊行。卿姐更會加碼，自己畀錢加製150條橫額，準備掛喺新界東，仲會租用貨車巡迴區內宣傳。
副局長、政治助理國籍、薪酬問題釀成政治風波，卿姐都笑言政府自己倒米，變相幫7.1遊行宣傳。佢話一個政治助理月薪，已經多過佢議員辦事處一個月開支，真係離晒譜，「政府請政治助理，我又係請助理，唔通我啲助理唔係人呀？我啲助理唔使食飯呀？」卿姐最近推出新書《偏向虎山行》，初版只印1,000本，唔通真係物以罕為貴？