無綫新聞前女主播方健儀（Akina），最近原來重投報道行業，但唔係報新聞，而係跳入天文台報天氣，仲即時喺facebook做live，再度以獨有聲線同粉絲會面。
「大家好，歡迎收睇天氣報告，天文台話今日天氣唔好，熱帶風暴橫過南海北部，其實奧巴馬就喺麥當勞度！」咦？點解佢報呢段天氣怪怪地嘅？原來係幾年前有位熱心網民，花盡心機用Akina以前報道嘅片段，逐粒字剪咗段rap版「新潮報道」，Akina好有心，真人演繹一次，希望大家滿意。

天文台長邀教玩fb

當然啦，之後佢都好認真咁報番9日天氣預測，例如嚟緊五一勞動節假期天氣係點，係咪令你特別期待放假呢？唔知係咪因為Akina好耐冇報過天氣，一開始講溫度都有少少口窒，但依然淡定，風範如昔。睇完氣溫，再睇埋衞星雲圖同戶外天氣實況，同樣難唔到佢，報道時仲七情上面，難怪有網民睇完條片都大讚佢「好生動」。
報完天氣，Akina都好謙咁講要喺錄影廠綠色chroma key背景前面，靠射喱眼望向鏡頭外一部小電視，先知自己有冇企錯位、讀錯嘢，都真係唔容易㗎！報完一輪天氣，天文台長岑智明同樣走上幕前，原來係宣佈天文台計劃明年春天開設官方fb，同大家網上交流一次，仲話要由Akina教天文台玩fb，唔通……Akina真係會落戶天文台，日日同你報天氣？

李八方