神秘富豪陳振聰同龔家嘅爭產案邊個贏、邊個輸，仲未露出端倪，但陳振聰似乎想做埋飛機大王。佢喺上年11月用咗10幾億，向空中巴士買入超豪嘅「Prestige」A350XWB私人飛機，事隔不過三個月，原來佢又同空巴密斟另一單大生意，計劃再次向空巴買飛機。

未落實買邊款機

對於陳生今次想買邊款機，空巴三緘其口。負責私人飛機市場嘅空巴市場部董事DavidVelupillai噚日見傳媒嘅時候，淨係透露佢同陳振聰旗下嘅CJetLtd斟緊單買賣，但因為未落實，所以冇嘢好講喎。
唔會係空中巨無霸A380啩？雖然A380咁大隻，啱做民航客機多啲，但去年市場盛傳有個阿拉伯油王，豪擲超過23億買架A380做私人行宮；如果陳振聰買架A380，咪可以名正言順稱「霸」囉！話時話，陳振聰架「Prestige」都幾多富豪鍾意；空巴最近又賣出第二架「Prestige」，由一名亞洲買家買咗，但空巴死都唔肯透露買家身份，因為好多富豪都唔多想咁高調。