馬季進入倒數階段，好多季內未嘗勝果的馬主，都希望在煞科前贏番場頭馬，戰意特別高昂。「綵」系的王氏家族名下有四駒今期上陣，其中頭場「好醒」上仗1200米姍姍來遲跑第三，莫雷拉肯繼續騎，可望先拔頭籌。

第一場四班1650米：方嘉柏馬房的「好醒」近幾仗跑谷草短途，總是後上姍姍來遲，今次大幅增程450米，初跑1650米，部署盡顯求勝決心。此駒母系全是長途氣袋一族，其母My Renee贏過2400米，同母馬亦贏至2850米。再者同父馬「四季」、「紅運精彩」及「富貴榮華」等，都贏過谷草中長途。由此可見「好醒」部署捨短報長，絕對有根有據。今仗只孭116磅兼排二檔，跑中距離可跟前守好位，贏面高唱入雲。

同場「靚先生」尺寸馬難發揮，但柏寶騎兩次都跑得好，一次中段發力走甩贏馬，另一次亦只輸短馬頭，人馬最合拍，現時48分肯定仲有權贏。「強中堅」近期晨課表現仍有朝氣，而且淋地可跑高一線，不能輕視。「實業風采」今季仲未贏馬，而跑四班賽始終可佔班利，匆匆再跑亦要提防。