尹光嬲爆鬧唔戴口罩嘅人好冇品：或者我寫首歌唱吓呢啲人
蘋果日報 2020/12/29 21:47
葉文輝今晚在觀塘舉行《你我齊禮讓 共融樂出行》Facebook直播，並邀請尹光擔任嘉賓。由於第四波疫情關係，尹光指工作大受影響，「全部工作都取消晒，我個人演唱會都取消過幾次，而家book咗3月喺高山劇場做一場大戲《帝女花》，一星期後開始賣飛，但未知做唔做得成。」尹光表示收入雖受影響，但並不重要，最緊要是健康，他續說：「大家少啲出街啦，就算出街都要戴口罩，但係我間中見到啲人好冇品，有啲唔戴，就算戴又掹咗落嚟，我又唔敢話佢，一話親佢都見好多人打交、鬧交、粗口爛舌，我哋始終驚人認得，咁咪唔敢（出聲）囉，有時我想講，我老婆話『唔好講呀，危險呀！』，或者我寫首歌唱吓呢啲人『大家戴口罩落街』咁樣囉！」
對於新城電台早前向員工派大信封，前線DJ成為今次重災區，當中在新城工作了23年的葉文輝將於明年1月1日起，與新城轉合作形式，他說：「我唔係全職，但都係合作伙伴，即係我自己嘅公司同新城電台合作，但好多嘢都係電台做主導，我係受薪，但唔係full time，多勞多得。」由於他早前放了兩星期假期，趕不及做檢測，所以未能幫手在明天舉行的新城頒獎禮。提到有指新城與香港音像聯盟（HKRIA）的合約將於今個月底完結，如未能續約成功，將會影響有關所屬公司的歌曲播放，以及歌手能否亮相新城節目和活動，葉文輝表示：「1月1 日起我有個新節目，我都計劃緊我啲嘉賓，我未收到公司指令係關於有啲公司係唔會合作，至於播歌版權方面，都知道嚟緊做節目嘅時候，要同公司配合返一啲版權上嘅嘢，因為我放緊假，所以未知點樣配合。」
尹光表示雖然工作受疫情影響，但他坦言並不重要，最緊要是健康。（蘋果日報）
啤梨下月將會以新形式與新城合作。（蘋果日報）
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！