近年網購盛行，加上過去舖租高企，令不少小店索性結束實體店舖，旺角多個昔日潮場湧現吉舖。由於舖租開始大幅回調，有個別小店「重出江湖」，再開實體舖營商。以賣Q版足球球星精品打響名堂的「IC足球部」老闆黃思輝（阿輝），闊別實體舖兩年後，近日在旺角W Plaza商場重新開店，以約9,000元租用1樓一個面積194方呎的舖位。

IC足球部由阿輝畫足球漫畫開始，累積不少粉絲，在2006年投資3萬元於九龍灣淘大商場創立，初期專賣Q版足球球星T恤，至後期賣各式精品。由於當年淘大月租只是3,000元，加上生意不俗，所以在三年後遷到旺角兆萬中心開業。旺角人流始終較多，一個月最高營業額曾達9萬元。

縱使生意不俗，但租金連年上升，阿輝由兆萬中心商場舖，逼到要搬上百寶利中心樓上舖，租金由09年1萬元加至2萬元，阿輝無奈要在2015年關舖，結束自己多年心血。阿輝直言「嗰時租金太貴，每年2,000、3,000蚊咁加，而且旺角好多商場賣嘅嘢開始冇特色，行嘅人少咗，見到網購已經成為一個趨勢，決定喺2015年5月唔做舖頭搞網店」。

雖然開網店未有舖租成本，不過就要每日都要分配時間去寄貨、運輸等工序，「每日可能要去寄幾次貨，會用多咗時間」。而且個別支持者亦因變成網店而未能購物，「18歲以下冇信用卡唔可以上網買嘢，50歲以上客人唔習慣網上購物，流失咗三、四成客，網店變咗只可以做熟客生意」。

有見舖租大幅回落，阿輝心動想重開店舖。「睇到整體租金已經跌咗40%，去翻較合理水平，始終實體舖可以做多啲生意，所以半年前開始出嚟搵舖」。在看過兆萬中心、信和中心等商場後，最終選擇在W Plaza商場開舖。「信和人流多好多，但租金又要1.5萬以上，W Plaza人流又唔算少，租金唔使1萬，認為比較值租」。現時租金，較阿輝09年首度殺入旺角時還要平。

是次重新開設舖位，租金、裝修等成本合共8萬元，相信實體舖每個月可做3萬至5萬元生意，較只做網店2萬至3萬營業額多六成。目前未有打算請人，阿輝自己親力親為，希望三個月內回本。

新店於本月3日開始試業，8日正式開張，阿輝坦言，試業了4至5日左右，營業額已經差不多夠交一個月租金，大部份都是熟客捧場，八成生意來自已光顧多於一次的熟客。

雖然開張時間撞正球季完結，阿輝就話影響不大，反而有時間設計下經典款式，更能吸引老一輩球迷，生意不會有太大落差。

記者於上周中其中一個試業日的下午到場，短短半小時，已經有2個客人購物，其中一個一買就已經差不多買了500元。

記者：程俊華 黃嘉銘

掌握財經生活資訊，即Like「蘋果ATM」fb專頁啦！
http://fb.com/appledailyatm