G.E.M. "Queen of hearts" 世界巡迴演唱會2017 香港站，今晚就喺紅館舉行，張栢芝都有嚟到現場睇，仲帶埋細仔Quintus、細佬張豪龍同埋囡囡，佢哋去到嘅時候，栢芝就喺IG開live，講佢哋入場發生嘅一件事，就係工作人員帶位嘅時候，錯咗五次先去到佢哋嘅位，最搞笑就係越調越前。

張栢芝喺live入面就話張豪龍囡囡好鍾意G.E.M.，所以今日一齊嚟睇，張栢芝開咗一陣live之後，演唱會準時喺8點半開始。

2300：G.E.M.就話：「多謝大家，呢個舞台真係帶俾我好多回憶，邊過一落到就感動到喊，邊過啱啱經歷分手，又試過喺台上感動到跪低，全場一萬人陪我祈禱。我喺呢度擁有過好多美好時光，我曾經多謝過好多歌迷、同事、家人，甚至係愛過或傷害過我嘅人，但有一位人我一定要多謝，仲好想現場一萬人陪我見証。多謝佢，令睡公主成長啦，呢位係我king of heart，我嘅上帝。然後邊喊邊講，多謝佢嘅 鼓勵令我心有盼望。」之後G.E.M.再一次encore，唱出最後一首歌 《睡公主》。

2257：Encore嘅時候，G.E.M.冇換褲，上身就換咗白tee加同色閃閃cap帽，唱《All about you》同《What did you go》。

2240：G.E.M.著住閃閃銀褲加外套，入面襯件黑色背心，喺台中表演 drum solo。

2225：然後，G.E.M.要大家今日把握機會向身邊人表達愛意，並攬攬隔離嘅人，然後再講有冇人想趁呢個機會表白，然後就有個男仔 拎住紮花走到台邊送畀G.E.M.， 總共係108支紅白玫瑰，G.E.M.問係咪送畀人？ 個男仔講係送畀G.E.M.，仲向G.E.M.求婚，G.E.M.即大嗌：「唔係呀嘛？認真㗎？死啦我而家有少少精神失常。」個男仔仲送咗一盒粉紅色嘅禮物，G.E.M.拎住盒禮物問：「咩嚟㗎？月餅嚟㗎？」打開嘅時候係一件紅色嘅連身短裙。

台下嘅觀眾就拍晒手起哄，G.E.M.就同個男仔講：「多謝你，你嘅提議我今晚去考慮吓再答覆你。」請走個男仔後再話：「我人生第一次係俾人求婚嘅經，我叫人表達愛意，點知真係表達咗。」

然後就再話我叫大家表達愛意，就係想準備咗一個medley送畀淨係香港嘅觀眾。

然後就唱出嗰幾首廣東歌Medley

2209：跟住唱歌之後，G.E.M.就話：「今次演唱會主題係queen of hearts 我哋就嚟講下愛，細個我好鍾意睇愛情小說，對愛情有好多不切實際嘅幻想，幻想一定係好海枯石爛山盟海誓，日日好似拍戲咁，但係當然呢啲係假象，當你開始拍拖嘅時候就知道愛情唔係咁，每個人都試過傷心，試過付出但係得唔到回報。」

之後G.E.M.又話：「我公公今日嚟咗香港， 佢每一次嚟香港以前都會同婆婆一齊嚟， 但係當六年前我婆婆走咗之後，公公就每次得佢自己一個嚟， 我每一次都問公公究竟你一個人點樣過， 公公就話我會諗住婆婆對我嘅好，鬧我嘅我唔記得， 令我知道原來愛係可以好單純， 就算佢唔喺你身邊都依然可以喺心入面支撐住你嘅生活 ，呢個時候台下嘅觀眾就叫阿姐唔好喊 ，眼見佢有少少淚光但係冇喊。」

2140：唱到黃大煒嘅經典歌《你把我灌醉》時，繼續騷高音，台下觀眾睇得好開心，反應非常熱烈，一班dancers拎住光管伴舞。

2116：唱完歌之後G.E.M.再講：「噚日喺呢度的綵排，我感覺到好熟悉，又返嚟呢度，記得2011年我19歲時第一次有機會喺呢度表演，一眨眼依家26歲，可能有好多聽我歌嘅朋友已經大個咗，令我覺得好感慨好多回憶。細個時好想做偉大嘅事，但當慢慢長大，發現最偉大嘅唔係你做咗啲咩，而係做咩都帶著愛，多謝大家7年來對我嘅愛，有你哋嘅支持好感恩有機會喺度開3場演出。」然後唱出汪峰嘅《存在》同周杰倫嘅《龍捲風》，唱《龍捲風》嘅時候，G.E.M.仲喺中間加咗段普通話rap。

G.E.M.成個演唱會都有一個好勁嘅技能，就係每一首歌，G.E.M.都一定有位可以嗌，真係唔簡單！

2059：唱完《你不是真的快樂》，個唱進入第二part，G.E.M.嘅第二套衫，係白色露腰小背心，爛牛仔褲配格仔衫綁腰，驕人上圍同虎背無所遁形，bra帶都幾乎有「爆開」危機！

然後G.E.M.開始一口氣唱《死了都要愛》、《我的秘密》等等，暫時都係得一首廣東歌。

2055：唱完三首歌，G.E.M. 開始講嘢，佢話：「HI，紅館！我返嚟喇！我想話唔知點解，紅館就係有神奇力量，我頭先未出場，企喺台中間，見到全場都係紅色，因為大家嘅螢光棒，感覺好似好大咁我從未開過4面台，今次已係我人生第5次喺紅館。」

「多謝你哋陪我！喺開騷前一個鐘，唔知點解我好緊張，好似第一次開騷咁，就算爸爸媽媽嚟後台搵我，我都淨係識得係呀係呀，但一出到嚟望到你哋覺得，你哋實在太靚，呢種感覺好震憾好珍貴，多謝你哋！」

2030：三角型LED舞台先出credit，8位dancers率先跳一輪舞，G.E.M.喺台中升起現身，一身紅色低胸連身裙加紅金色斗蓬，短裙騷腳睇落相當有肉地，上月喺新加坡巡迴個唱期間已經著過。之後唱出《A.I.N.Y.》。第二首就係廣東歌《What Have U Done》，唱之前仲話：「香港嘅朋友，Sing with me。」