JW嘅有米富二代男友葉韋彤（Tarzan），係連鎖店卓悅太子爺，屋企坐擁12億資產，有錢人等級數一數二。

Tarzan喺英國讀完大學，就返香港幫屋企打理家族生意，出任項目經理一職。喺佢Ig，就不時分享佢海陸空奢華生活，例如坐私人飛機去遊埠，開遊船P咁，不過要數到佢至愛，就肯定係佢啲名車，由保時捷、Rolls Royce、法拉利、Benz Jeep乜都有，仲會自訂車牌，以自己個姓氏砌出唔同組合，總之架架都係佢個名咁。

最令人驚訝嘅係，大半年前Tarzan同朋友坐私人飛機去拉斯維加斯，唔係賭錢，而係去學從軍揸坦克，咁嘅生活，真係令人好葡萄呀！

除咗名車，Tarzan亦愛玩表，喺佢Ig就見過佢大騷黃金Rolex、AP、Panerai、Hublot、百達翡麗等名表，連人氣嘅Yeezy波鞋、Bearbrick公仔、Iron Man嘅figure佢通通都啱，絕對係一個富貴kidult。

要數富豪象徵，又點少得馬呢？Tarzan年紀輕輕已經成為馬主，佢名下有隻馬叫「一支梅」，之前都帶個女友JW入馬場威，佢嘅富爸爸葉俊亨亦係馬主，名下馬匹包括已退役嘅「齊喝采」、「齊大勝」同新馬「大美人」。