巴黎時間下午兩點半，霆鋒現身當地欣賞Valentino時裝騷，同場仲有徐濠縈、林恬兒、吳建豪太太石貞善，仲有賭王四太梁安琪及超盈、猷亨等等。

一身紫色迷彩西裝、官仔骨骨嘅霆鋒同Mani霍汶希到場，戴上黑超，依然好chok，但態度友善，影相時亦肯合作地除低黑超。佢話此行會留十日，並到趙薇個酒莊拍攝佢個飲食節目。提到舊愛王菲同最新緋聞女友JaniceMan都身在巴黎，霆鋒笑道:「好多人都喺巴黎，我唔答呢啲問題。」第一次睇女裝fashionshow，佢都話:「睇女裝係有啲唔同。」又打趣謂:「係啦，你哋平時見我都爛撻撻嘅。」拿，今次冇話你MK呀。

見到霆鋒，而王菲又身在巴黎，點都要問問佢會否同王菲見面0架啦？霆鋒就話:「我唔答呢啲問題。」至於王菲方面對於鋒菲巴黎再聚就簡單回應道:「這是幻想來的，怎樣回應？」

此外，今日嘅Chanel騷亦便吸引咗徐濠縈、時尚名人AnnaDellaRusso與Rihanna等捧場，阿徐話會喺巴黎逗留一星期，順度為時裝店入貨。後天便係阿徐40歲生日，佢透露將到名古屋跑馬拉松度過：「生日嗰日會出發去名古屋跑馬拉松，我覺得有意義，又可以避開啲應酬。」至於因為身形纖瘦被笑指係「肯雅徐」，阿徐笑道：「都好呀，又跑得又夠柴，我重想跑多幾個城市，4月會去華盛頓，希望跑到大滿貫。」

林建岳千金林恬兒噚晚現身ElieSaab秋冬騷，更與吳建豪太太石貞善（Arissa）結伴睇騷，記者恭喜恬兒今年完婚，佢就好尷尬咁話：「恭喜佢至啱。」再問佢係咪專誠來訂造嫁衣？林恬兒不願多談：「唔係，PR介紹啲人畀我識，識吓人。」之後即匆匆離開，而Arissa亦婉拒記者採訪。