監察西九文化區計劃推行情況聯合小組委員會會議噚日開首次會議，選正副主席。民建聯葉國謙做主席唔算意外，但副主席竟然選出民主黨嘅李永達，就有啲失驚無神。助高達一臂之力嘅，仲係經常唱對台嘅民建聯。
話說會議嘅第一回合係選主席，由於事前泛民同民建聯傾唔掂數，於是各有各派人，由梁家傑對撼葉國謙，結果袋巾10票對11票輸咗，其中投畀阿謙嘅譚偉豪同林大輝，臨近投票先至匆匆趕到，加埋先至以多出一票險勝。袋巾一向好關注西九發展，立會呢個小組亦係佢主力推動，但噚日泛民飯盒會以抽籤決定高達出選副主席，袋巾惟有用成員身份做監察。

李永達意外勝出

第二回合選副主席亦有啲曲折。鼠王芬以程咬金姿態加入角逐，大家以為票數同選主席一樣啦，點知高達竟然以15票對5票，贏鼠王芬兩條街。計番啲票，鼠王芬所屬嘅專業聯盟，計埋總共4票，即係民記只有1票投畀佢，亦即係其他人都投票畀高達。鼠王芬會後捉實阿謙唔放，問點解選主席時全部票畀晒佢，到選副主席民記竟然冇善意回應？阿謙話，民記係自由投票，冇夾過喎。原來佢哋亦唔想自己友做晒正副主席，避免去得太盡。