當年今日

新登場:扺食北海道名牌料理
銅鑼灣擴張勢力

蘋果日報 2002/02/27 00:00


在日本有十五年歷史,有三十多間分店的魚一丁刺身居酒屋,第一間海外分店自數月前進駐香港銅鑼灣後,店舖每晚都擠滿等食之人,唔想再等?無問題,事關第二間分店已經在世貿中心靜靜地開幕了。今次除了繼續大賣抵食夾大件的北海道料理外,同時亦有數款新菜登場,訂位前一於先睇睇有咩必食之選!

記者:黃婉冰 攝影:陳穎
豆腐沙律$60
由日本運來黃豆在香港自製豆腐,其特點是豆味唔重,所以做出來的豆腐滑溜溜,另有忌廉芝士粒、生菜、青瓜絲、番茄粒、炸日本腐皮,淋上自家秘製的芝麻醬,點止豆腐咁簡單?

試味報告:
入口芝麻醬已經突圍而出,芝麻香味令人愈食愈想食,日本腐皮薄而香脆,豆腐滑得來質感較重,有咬口,唔會入口即散。
刺身盛盒$220
北海道盛產海鮮,各款魚生當然唔少得,這款刺身盛盒集九種不同刺身,分別有三文魚、吞拿魚、油甘魚、鱲魚、帶子、八爪魚、甜蝦、魷魚、蟹膏麵豉,味道有濃有淡,其中蟹膏麵豉由北海道運來,以松葉蟹膏製成,味道同蝦膏差不多,無蝦膏咁濃味。

試味報告:
分量好足,最啱幾個人一齊分享。一碟有齊濃、淡兩種魚生,可以各取所好,若嫌蟹膏麵豉味道過濃,可以塗在青瓜上一齊食,效果不錯。
活油甘魚BB刺身$150/條
三月新菜式中有這款油甘魚BB活魚料理,屬於白魚類的油甘魚脂肪較少,身形細細,最適合用來做活魚料理。要食出鮮味,師傅特製檸檬醋代替豉油、芥辣,帶出魚香,剩低的魚頭魚骨記得畀大廚幫你用來煲麵豉湯,免費㗎。

試味報告:
魚肉偏向爽,味道亦較淡口,檸檬醋比普通的酸汁更酸,愈食愈開胃。
炸魚安魚康魚$50
日本人視之為寶的魚安魚康魚被師傅煎皮拆骨,以豉油、清酒、薑汁醃過,蘸滿炸粉炸至金黃,食時只需滴少許檸檬汁,香濃惹味,最好當然係做送酒小食!

試味報告:
外表炸得香脆,唔會油淋淋,魚肉嫩滑鮮味,但魚味唔算太濃,肉質咬落有少少同普通魚唔同。
日式煎蛋卷$45
師傅話做日式煎蛋卷最能睇出師傅手勢是否正宗,由多層蛋皮叠成的蛋卷,要煎得香滑唔鬆散先係最高境界。雞蛋加入木魚水,令蛋卷入口更滑,跟足日本人傳統食法,加蘿蔔茸、豉油,可以幫助減低油膩感。

試味報告:
叠得厚厚的蛋卷,即叫即煎熱辣辣,未食已聞到陣陣蛋香,入口蛋味重且夠滑,每條都有成吋厚,難怪要夾蘿蔔茸一齊食,否則食完兩三件個肚都要投降。
蘆薈湯圓$38
日本人鍾意食無餡湯圓,只會在糯米內加入不同味道,白色代表原味,綠色代表綠茶味,粉紅色代表花味,在糖水中央的並非芝麻雪糕,而是紅豆茸,伴以蘆薈、芒果,就成了日本版「芒果撈野」。

試味報告:
綠茶湯圓味道最濃,櫻花湯丸入口時有清香花味,咬落若隱若現,蘆薈清甜,湯圓細細,整體來說不會太甜膩,幾有特色。
店名:魚一丁
電話:28827468
地址:銅鑼灣告士打道280號世貿中心商場3樓312-313號舖
座位:167個
營業時間:上午12時至下午3時,下午5時半至凌晨12時。
付款方法:現金及信用卡(Visa,Master,Diners,AE)