「我犯了全天下男人也會犯的錯」、「中國人還是需要被管的」、「中國製的電視機會爆炸」、「有時我真的想見到有國家發生災難」……呢啲金句不時喺網上見到，就係出自成龍口中!

雖然成龍間唔中就語出驚人，不過成家班一眾兄弟就有情有義，眨吓眼，成龍帶領住「成家班」打江山已經40年，噚日喺北京盤龍谷成龍藝術中心搞成家班40周年活動，回顧過往嘅艱辛，懷念已故嘅兄弟!

成龍忍唔住激動落淚，事後透露「嬌姐也提醒我，不要總在電視上哭，不好看」，出席有8代成家班71位兄弟全員到齊，仲有好友曾志偉、唐季禮、「元家班」元彬、元德、成龍、元彪及元華等均有到賀，洪天明則代表爸爸「大哥大」洪金寶出席，而阿諾舒華辛力加、馮小剛同彭于晏等錄影道賀。

一向感性過人嘅成龍喺現場哭喊「所有的榮譽都屬於成家班的兄弟」，晚上仲喺微博感慨「成立成家班的時候，我想不到能有40年」，成龍喺微博寫道：「今天活動開始前，志偉跟我說，拿點紙巾吧，我說今晚不會再哭了，上次已經哭太多了，嬌姐也提醒我，不要總在電視上哭，不好看。但是到了活動現場，看到大家帶著家人從世界各地趕來，看到兄弟們以前用命換來的電影畫面，看到我們年輕時候意氣風發、現在已經白了頭髮的樣子，看到新一代的成員們正意氣風發，尤其看到馮克安，周潤堅、韓春、岑潛波、薛春煒五位兄弟已經永遠離開我們……還是忍不住掉了眼淚（其實曾志偉比我哭得還更快）。」

另外，成龍喺活動上透露廿年前已經想搞嘅「中國特技人協會」，即將成立，將捐出100萬人民幣作為成家班保險基金，「只願成家班可以再有50年、60年、70年，將來即使我不在了，成家班還能繼續存在！兄弟們，這輩子能遇到你們，我不枉此生!」成龍亦聯同唐季禮及成家班喺北京盤龍谷成龍藝術中心種樹。