【餐桌禮儀】畀古達度笑「食到好似變型俠醫」 迪歷特女友：調教咗佢喇
蘋果日報 2021/02/02 00:15
祖雲達斯意甲古達度馬菲斯迪歷特AnneKee Molenaar
迪歷特畀祖記隊友古達度出賣，甫晒佢嘅醜怪食相上IG。
今季由阿積士轉投意甲祖雲達斯嘅20歲荷蘭中堅馬菲斯迪歷特，嚟到祖記差唔多一季後，已經同成班隊友好熟絡，近日仲慘畀古達度「出賣」，事關呢位哥倫比亞翼鋒近日喺IG貼出迪歷特嘅醜怪食相，仲笑佢食到好似復仇者入面嘅變型俠醫，最後要迪歷特女友出手調教！
古達度甫出迪歷特喺祖記球會入面嘅食晚餐嘅片段，片入面佢自己一個孤獨食沙律，仲好飢餓咁大啖大啖塞入口，一路食啲沙律菜就一路跌出嚟，佢仲旁若無人咁周圍望。呢個moment就畀古達度捕捉到，佢喺IG story寫住：「你食到好似變型俠醫！」側邊仲放咗隻綠巨人襯返迪歷特。
迪歷特都算係靚仔嘅足球員，食起嘢上嚟點可以失儀態呢，所以佢嘅模特兒女友AnneKee Molenaar就出手調教下佢，然後喺自己IG甫返男友好似紳士咁四四正正食西餐，仲幫迪歷特將餐巾掛喺領口，標籤返古達度話：「教咗佢喇」。
一路食，啲沙律菜就一路跌出嚟。
經女朋友調教後，成個紳士咁。