地產C退休近十年，到處通街走。喺中環馬莎門前等過馬路之際，忽見地產C行過，身穿薄衣，披上冷外套。佢已年逾七十，對比之下，左丁山穿恤衫打呔、冷衫西裝外套，外加羽絨褸，實在十分慚愧。地產C話：「你梗係成日坐，冇運動；我就朝朝行山，打太極，飲完早茶，回家小睡，中午就出嚟逛街，一味行，你睇我幾壯健！」可惜自己暫時無福退休，學唔嚟，問佢閒時有乜節目，地產C話：「呢，我好有文化㗎，大會堂、文化中心、新光戲院啲劇目，我一一清楚，最鍾意睇粵劇、聽粵曲；粵語話劇亦睇。嗱，年初十有好嘢，阮兆輝、任冰兒、梅雪詩、李龍嘅鳳和鳴劇團喺新光上演《花田八喜》，咪錯過。」

阮、任、梅就識，李龍係邊個？地產C話：「你真係孤陋寡聞，最近一套講薛覺先嘅話劇《寒江釣雪》，好好睇，扮薛覺先嗰位就係李龍吖嘛。」聽地產C講多啲，年初十（一月三十一日）晚嘅戲，係義演籌款，幫助老人家嘅，幾位大老倌不收戲金，義演名劇籌款扶助老人，需各方支持。地產C退休前收入極佳，退休生活豐裕，買飛睇戲做善事，唔會眨眼，但門票價分二千、一千、五百、三百、二百、一百，就未必係人人負擔得起。地產C建議啲行有餘力之人或者孝順仔女買飛，送畀家中長者，再唔係就買飛送畀聖雅各福群會（電話：28313232），等佢哋派畀清貧長者，一齊在新春享受好戲。做善事，新春納福，大家可以諗吓。