太子鐘錶老闆鄧鉅明同太太宣宏雁、萬希泉創辦人沈慧林(William)等，今日喺灣仔出席鐘表展開幕，鄧生以品牌廊贊助商身份現身開幕禮，仲同太太甜密晒恩愛，鄧生話：「今年第8年參加，由8年前頭髮全黑，到8年後頭髮白晒，再8年後就冇晒頭髮。o依家係成熟型，要對太太更好，因為自己冇安全感，女人都會照顧我多啲。」鄧生經常口甜舌滑，鄧太笑言當佢唱歌，兩公婆啱啱去完郵輪旅行3星期，鄧生話：「返嚟要努力搵錢，賣多啲錶，最近目標係賣1億6千萬嘅錶王，有260幾卡鑽石，全世界得一隻，5年前賣咗隻7,500萬，今次double，唔否定下次3億2千萬，o依家有兩個買家傾緊。」鄧生就話需要嘅話會親身做sales，不過鄧太就潑冷水話：「佢講廢話就叻，sales唔叻。」

另外，William創業後就開始喺錶展做展覽，嚟緊佢仲會搞4場騷，分別邀請咗好友詹瑞文同陳曉東等出席，提到東東日前同粉絲慶祝生日，但就有人投訴話東東提早走咗，William就幫東東解畫話：「我知道佢隻眼係康復中，有閃光就會好辛苦，知道佢都好努力，為咗歌迷出席聚會，佢工作太忙冇乜時間休息，希望佢快啲好返。」