個市上個禮拜尾跌咗兩日，恒指唔見咗幾百點，昨日終於做番齣好戲，升番184點收市，不過成交只係得444億元，指數好長時間都係窄幅拉鋸，好彩國企股醒番晒，仲有嘢炒。
吼低位買中移動（941）輪呢招成功咗，中移動昨收62.85元，升1.7%，隻C輪3496報收58仙，升9.4%，正股今日應該仲有得升，如果升到阻力位破唔到，就要先食糊，破位就睇高啲，跟番策略就得。
早幾日講過隻和黃（013），話好友搵佢頂住個市，介紹咗隻C輪9742，正股經過1日調整後又炒番上去，成個勢要試80元，9742昨收73仙，升21%，正股守住75.8元都唔使沽住。
工行（1398）昨收4.12元，班大戶密密收，得閒又掃一浸勁嘅，技術走勢愈嚟愈靚，一旦向上拋離4.15元，隨時會絕塵而去，早幾日介紹嘅C輪4977，愈嚟愈吸引。

建行C輪9585：國內開放銀行業市場，啲外資銀行紛紛入股國內銀行，初到貴境，梗係玩合作比玩競爭更着數，所以開放市場唔使睇得咁灰，大家應該明白點解國內銀行股愈升愈有，睇嚟未來半年，國內銀行股仍然會受到股民同基金熱烈追捧。
建行有實力又係恒指成份股，自然不乏買盤，股價昨收4.24元，日內如果成功升破4.37元關，就會向4.6元推進，可以諗吓啲C輪。建行C輪9585昨收40.5仙，槓桿率10.5倍（有效7.4倍），對沖值0.7，正股升上4.37元，9585應該見到50仙，正股升上4.6元，隻C輪應該在65仙樓上，呢個價買，正股跌穿4.1元止蝕。
俊樺